“Azərbaycan və Ermənistan xarici işlər nazirlərinin Moskvada aparılan danışıqları Bakı və İrəvanın sülh müqaviləsini yaxınlaşdırmaq məqsədi daşıyır. Rusiya üçün isə bu, özünü nüfuzlu vasitəçi statusunda saxlamaq üçün növbəti cəhd oldu. Bununla belə, tərəflər hələlik kompromisdən uzaqdırlar və etiraf edirlər ki, görüşlərin tezliyi onların effektivliyinə təsir etmir. Bakı sülhə can atsa da İrəvan gözləmə mövqeyindədir. Azərbaycan tərəfi səbrinin hüdudsuz olmadığını da hər vasitə ilə açıqlayır. Ölkə rəhbəri kənar qüvvələrin bu münaqişənin həllində maraqlı olmadığını da hər görüşündə bəyan edir. Ermənistanla Azərbaycan sülh axtarışındadır, kənar qüvvələr isə Ermənistanı silahlandırmağa davam edir”. Bunu SİA-ya açıqlamasında Milli Məclisin deputatı Aydın Hüseynov deyib.
Deputat XİN başçılarının göründə tərəflərin hələ də uzlaşmadığı, ortaq mövqeyə gələ bilmədiyi məqamları müzakirə etdiklərini bildirib: “Azərbaycan və Ermənistan Rusiyada artıq neçənci dəfədir ki, keçirilən danışıqlar prosesi ətrafında sonradan yenidən başlamaq üçün manevr edirlər. Sülh sazişi imzalamağa çalışan iki ölkənin xarici işlər nazirləri Vaşinqton, Brüssel və Moskvada görüşüblər. İyun-iyul aylarında Azərbaycan və Ermənistan xarici işlər nazirləri Ceyhun Bayramov və Ararat Mirzoyan eyni platformanı bölüşüblər. İyunun sonunda iki ölkənin XİN başçıları ABŞ-a səfər edib, iyulun ortalarında Brüsseldə görüşüblər və həmin ayın sonunda danışıqlar üçün Moskvaya uçublar. Danışıqların coğrafiyası Cənubi Qafqazda baş sülhməramlı titulu uğrunda Qərb və Rusiya arasında rəqabətə işarə edir. Rusiyanın xarici işlər naziri Sergey Lavrov görüşün məqsədini “Cənubi Qafqazda uzunmüddətli sabitləşmə” adlandırıb. O, Moskvanın hansı rola arxalandığını qeyd edib. Bakı ilə İrəvan arasında sülh müqaviləsinin bağlanmasına dair ən yüksək səviyyədə razılaşmaların həyata keçirilməsinə xüsusi diqqət yetirməyin lazım olduğunu bildirib. Məsələ burasındadır ki, məhz kənar müdaxilələr səbəbindən hələ də sülhə yaxınlaşmaq mümkün olmur. Amma ilin sonuna qədər nəhayət sülh müqaviləsinin imzalanacağı proqnozlaşdırılır. Bu günə qədər Vaşinqtonda, Brüsseldə və Moskvada təmaslar qurulub, amma nəticə yoxdur. Nəticələr danışıqlar prosesinin dinamikasından bir qədər aşağıdır, lakin heç bir müsbət nəticənin olmadığını desək, yəqin ki, düzgün olmaz. Görüşlər, danışıqlar kifayət qədər intensiv xarakter daşıyır, bəzi məsələlərdə konkret nəticələr var, bəzi məsələlərdə bəzi perspektivlər var ki, orada tərəflər qarşılıqlı razılığa gələ bilərlər”.