“Fransa prezidenti Emanuel Makronun Azərbaycan barədə fikirləri cəfəngiyyatdan başqa bir şey deyil. Çıxışlarından da görünür ki, Makron Cənubi Qafqaz siyasətində çox naşıdır. Regionun özəlliklərini nəzərə ala biləcək səviyyədə deyil, çünki onun bilgisi yalnız erməni qaynaqlarına, erməni yalanlarına əsasən formalaşıb. Makron danışdıqca özünü ifşa edir, ermənipərəst mövqeyində olduğunu büruzə verir. Belə bir dövlət başçısının Azərbaycan barədə, yaxud regionda baş verən hadisələrlə bağlı fikir bildirməsi, xüsusən də Ermənistan-Azərbaycan münaqişəsinin tənzimlənməsində iştirak etməsi mümkünsüzdür. Bunu Fransa ATƏT-in Minsk qrupunun keçmiş həmsədri kimi sübuta yetirdi. Məhz bu ölkənin destruktiv, təxribatçı əməlləri, Ermənistanı birbaşa dəstəkləməsi, obyektivlikdən uzaq siyasəti səbəbindən münaqişə düz 30 il həll olunmamış qalmışdı”. Bunu açıqlamasında Milli Məclisin deputatı Aydın Hüseynov deyib
Deputat qeyd edib ki, Makron həm 44 günlük Vətən müharibəsində, həm də post-münaqişə dövründə dəfələrlə anti-Azərbaycan bəyanatları ilə yadda qalıb: “Fransa prezidenti müharibə və müharibədən sonrakı dövrdə öz məqsədlərinə nail ola bilməyib. Makronun birbaşa təşəbbüsü ilə Azərbaycana qarşı sanksiyaların tətbiq edilməsi də onun ölkəmizə qarşı kin və nifrətindən irəli gəlir. Fransa prezidenti guya Azərbaycan Prezidenti İlham Əliyevə təzyiq göstərildiyi barədə iddialar irəli sürür. Halbuki, Azərbaycan Prezidentinə kimsənin təzyiq göstərmək iqtidarında olmadığını özü də yaxşı bilir. Onu da bilməmiş deyil ki, İlham Əliyev bütün zamanlarda ölkəmizin milli maraqlarını beynəlxalq hüququn norma və prinsipləri əsasında daim uğurla müdafiə edib. Prezident Makron erməni lobbisinin əlindəki maşadır. Bunu o erməni icmasının nümayəndələri ilə görüşündə də bir daha təsdiq etdi. Fikir verin, Ermənistanın baş naziri Qarabağın Azərbaycanın tərkib hissəsi kimi tanıyır, Makron və onun komandası isə bunun əksini deyir, daha doğrusu erməni lobbisinin ağzı ilə danışır. Həmin ermənilər isə Ermənistanda arzuolunmaz şəxs elan olunublar və onların ölkəyə girişi qadağan edilib. Prezident Makronun bu kimi qərəzli bəyanatları bölgədə sülhə və əmin-amanlığa təhdiddir, separatçılığı və terrorçuluğu təşviq edir”.