Yevlaxda qəzaya düşən hakim-inspektorun əməliyyat olunacağı tarix açıqlanıb

Yevlaxda avtomobil qəzasında xəsarət alan hakim-inspektor Ceyhun Haşımovun əməliyyat olunacağı tarix bəlli olub.

Bu barədə “Report”a onun qardaşı Mübariz Haşımov məlumat verib.

FIFA dərəcəli referinin sözlərinə görə, C.Haşımov dekabrın 16-da əməliyyat ediləcək: “Vəziyyəti orta sabitdir. Həyatı təhlükəsi sovuşub”.

M. Haşımov qardaşının AFFA-nın nəzarəti altında özəl xəstəxanada müalicə aldığını xatırladıb: “Çanaq sümüyündə çoxsaylı sınıqlar var. Bud sümüyündə də sınıq aşkarlanıb. Əməliyyat olunacaq və çanağı protezlə əvəzlənəcək. Bu isə xüsusi sifarişlə gətirilir. Həkimlər ən yüksək standartlara cavab verən protezdən istifadə etmək istəyirlər. Onun da ölkəmizə gətirilməsi və hazırlanması müəyyən vaxt tələb edir”.

FIFA dərəcəli hakim laynsman Elmin Süleymanovun da durumu ilə maraqlandıqlarını sözlərinə əlavə edib: “Onun da yanında olmuşuq. Almacıq sümüyündə, burnunda və çənəsində müxtəlif xəsarətlər var. Amma hazırda normal vəziyyətdədir, danışa bilir. Müəyyən vaxtadək hər ikisi üçün ağrıkəsici vasitələrdən istifadə olunacaq. Vəziyyətləri yaxşıdır”.

Qeyd edək ki, futbol hakimləri dekabrın 10-da qəzaya düşüblər.