“Xocalı rayonunun Fərrux kəndinin və onun yaxınlığında yerləşən Daşbaşı yüksəkliyinin azad edilməsi Azərbaycan Ordusunun Zəfər tarixində yeni bir səhifədir”.
Bunu “Unikal”a açıqlamasında hərbi ekspert Ədalət Verdiyev deyib. Onun sözlərinə görə, birgə bəyanatın imzalanmasından sonra Azərbaycanın Xocalı rayonu ərazisində yerləşən yaşayış məntəqəsini və yüksəkliyi azad edərək oraya bayraq sancması bizim üçün böyük əhəmiyyət daşıyır:
“Fərrux yüksəkliyinin azad edilməsi Azərbaycana ətrafda yerləşən 10-a yaxın yaşayış məntəqəsinə, Ağdərə-Əsgəran-Xankəndi magistral yoluna vizual və atəş nəzarətini təmin edir. Azərbaycan Rusiya sülhməramlılarının nəzarətində olan ərazilərdə yumşaq güc tətbiq edib, erməni silahlılarını təmizləməklə bir daha nümayiş etdirdi ki, bizim ərazimizdə yalnız Azərbaycanın qanunları, diktə etdiyi şərtlər qüvvədədir. Azərbaycan bu qələbə ilə Qarabağda mövcud olan “erməni xilaskarı” mifini darmadağın etdi. Fərrux Zəfəri Rusiya sülhməramlı kontingentinin nəzarətində olan ərazilərin azad edilməsi prosesinin birincisi olsa da, sonuncusu deyil. Şübhəsiz ki, Azərbaycan tərəfi bu istiqamətdə fəaliyyətini kifayət qədər intensivləşdirəcək”.
