Bu gün Bakı Limanında Albaniya, Mərakeş, Macarıstan, Burundi, Çad, Konqo, Qazaxıstan, Qabon, Paraqvay, Rumıniya və Şri-Lankandan olan 15 diplomat qonaq olub. ADA Universitetinin İnkişaf və Diplomatiya İnstitutu və Azərbaycan Respublikasının Beynəlxalq İnkişafa Yardım Agentliyinin birgə təşkilatçılığı ilə həyata keçirilən səfər çərçivəsində qonaqlara Bakı Limanının Avrasiyanın ağıllı və yaşıl limanına çevrilməsi yolundakı baxışları və strateji məqsədləri barədə məlumat verilib.

Əsas məqsədi inkişaf etməkdə olan ölkələrdə insano kapitalının inkişafına dəstək vermək, o cümlədən xalq diplomatiyası vasitəsilə Azərbaycanla əlaqələri gücləndirmək, onun tarixini, mədəniyyətini və iqtisadi inkişafını təşviq etmək olan proqram çərçivəsində, qonaqlar Bakı Limanının terminallarının iş prinsipi ilə də tanış olublar. Həmçinin iştirakçılara, regional yaşıl dəhlizlərin səmərəli əlaqəsinin qurulmasında Bakı Limanının təşəbbüsləri, regional logistika və nəqliyyatın gələcək dayanıqlığını təmin etmək üçün insan kapitalının inkişafına töhfə verən təhsil proqramları barədə də məlumat verilib.

Bakı Limanı olaraq bu təşəbbüsə görə Azərbaycan Respublikasının Xarici İşlər Nazirliyinə və ADA Universitetinə təşəkkürümüzü bildiririk. Bu cür təşəbbüslər Avropa və Asiya arasında, qədim İpək Yolunda yerləşən Azərbaycanın rolu və coğrafi mövqeyi haqqında qlobal məlumatlılığın artırılmasına töhfə verir.