Bakı şəhərinin Qaradağ rayonuna daxil olan Ələt qəsəbəsi son illərdə Azərbaycan iqtisadiyyatının diqqət mərkəzinə çevrilib. Regionun ən mühüm strateji layihələrindən biri olan Ələt Beynəlxalq Dəniz Ticarət Limanı, Ələt Azad İqtisadi Zonası (AFEZ), həmçinin yaxın gələcəkdə nəzərdə tutulan hava limanı – bütün bunlar qəsəbəni ölkənin iqtisadi xəritəsində mərkəzi mövqeyə çıxarıb. Lakin bütün bu möhtəşəm layihələrin fonunda qəsəbənin sakinləri üçün həyati əhəmiyyət daşıyan sosial infrastruktur sahələri acınacaqlı vəziyyətdədir.Ələtin yeganə istirahət yeri olan park faktiki olaraq mövcud deyil – baxımsızlıq, dağılmış oturacaqlar, məhv olmuş yaşıllıq sahələri və təhlükəli oyun meydançaları qəsəbə əhalisi, xüsusilə uşaqlar və yaşlılar üçün ciddi narahatlıq doğurur. Belə bir strateji məkanda, ölkə iqtisadiyyatına milyardlarla dollar dəyərində töhfə verən layihələrin mərkəzində insanların gündəlik ehtiyaclarının bu qədər diqqətdən kənarda qalması suallar doğurur.Daha faciəvi vəziyyət isə Şəhid Zaur Qurbanov adına mədəniyyət evində yaşanır. Adı qəhrəman şəhidimizin xatirəsini daşıyan bu mədəniyyət ocağı hazırda bərbad vəziyyətdədir – damı uçmuş, otaqları istifadəyə yararsız, avadanlığı köhnə və yararsız haldadır. Mədəniyyət evləri yalnız əyləncə məkanları deyil, həm də gənclərin maariflənməsi, milli dəyərlərin təbliği və cəmiyyətin mədəni inkişafı üçün vacib platformalardır. Ələt kimi strateji bölgədə belə bir obyektin bu vəziyyətdə olması həm şəhidin xatirəsinə hörmətsizlik, həm də dövlətin mədəni siyasətinin lokal səviyyədə həyata keçirilməsində ciddi boşluqların göstəricisidir.Ələt Azad İqtisadi Zonasında fəaliyyət göstərən onlarla yerli və xarici şirkətin varlığı bu cür sosial problemlərin həllinə dəstək vermək imkanlarını artırır. Sosial məsuliyyət prinsipləri çərçivəsində bu şirkətlər, eləcə də dövlət qurumları qəsəbənin sosial infrastrukturu üçün resurs ayırmalı, park və mədəniyyət ocağı kimi obyektlərin bərpasını prioritet məsələ kimi görməlidirlər.Ələtin yalnız iqtisadi mərkəz kimi deyil, eyni zamanda yaşamaq üçün layiqli bir məkan kimi inkişaf etdirilməsi vacibdir. Çünki inkişaf yalnız binaların tikilməsi və yolların çəkilməsi ilə ölçülmür – bu, insanların həyat keyfiyyətinə necə təsir etdiyilə müəyyən olunur.