“Rusiya-Azərbaycan arasında qarşılıqlı dostluğa əsaslnan münasibətlər son illərdə daha da inkişaf edır. 2022-ci ilin fevral ayında Moskvada imzalanmış müttəfiqlik haqqında Bəyannamənin icrasından ötən bir il ərzində ölkələrimiz arasında münasibətlərin inkişafı daha da artıb. Bəyannamə mahiyyət etibarilə bizim münasibətlərimizin ruhunu və xarakterini, əlaqələrimizin formalaşmış müsbət resursunu əks etdirir, gələcək illərdə qarşılıqlı fəaliyyətin yollarını müəyyənləşdirir və yeni iqtisadi-siyasi əlaqələrin dinamikasına öz müsbət təsirini göstərməkdədir. Eyni zamanda, Rusiya ilə ölkəmiz arasında siyasi dialoqun daha da möhkəmlənməsi üçün imkanlar artır, xüsusilə də regional təhlükəsizliklə bağlı məsələlərin nizamlanmasında əhəmiyyəti müsbət tendensiyalar müşahidə edilir. Bu baxımdan Sergey Lavrovun ölkəmizə səfəri strateji əməkdaşlığın artmasında öz töhfəsini verəcək”.
Bu barədə AzNews.az portalına Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov Rusiya Federasiyasının xarici işlər naziri Sergey Lavrovun Azərbaycana səfərini şərh edərəkən bildirib.
Millət vəkili qeyd edib ki, Rusiya hazırda Azərbaycanın azad edilmiş ərazilərində müvəqqəti sülhməqamlı missiyanı yerinə yetirir, bu bölgədə sülh və təhlükəsziliyin möhkəmlənməsi, Azərbaycan ilə Ermənistan arasında münasibətlərin normallaşmasında irəliləyiş üçün əhəmiyyətidir:
“Ona görə də Ermənistan sülh müqaviləsinin imzalanmasında Moskvanın təşəbbüsləri və vasitəçiliyi mühüm rol oyanaya bilər. Xarici işlər naziri Sergey Lavrovun açıqlamasından görünür ki, Rusiya Azərbaycan ilə Ermənistan arasında münasibətlərin nizamlanması yolunda irəliləyişə böyük maraq göstərir. Eyni zamanda, Zəngəzur dəhlizinin açılmasında Rusiyanın təşəbbüskarlığı yüksək dəyərləndirilə bilər”.
A.Hüseynovun sözlərinə görə, Rusiya Azərbaycanın ən yaxın iqtisadi tərəfdaşıdır, respublikamızın ticarət dövriyyəsində 3-cü yerdə dayanır. İki ölkə arasında 2022-ci ilə qarşılıqlı əmtəə dövriyyəsinin həcmi 3 milyard dollar təşkil edib. Rusiya Azərbaycanın qeyri-neft ixracında birinci yerdə dayanır. Xüsusilə də kənd təsərüfatı məhsullarının ixracı bazarında bu ölkə lider mövqeyə malikdir. Eyni zamanda, Azərbaycandan Rusiyaya sənaye məhsulları göndərilir, qeyri-neft ixracatında 15% payı olan plastmas və kauçuk məhsullarının da 50%-i Rusiya bazarına gedir. Rusiya indiyədək ölkəmizin iqtisadiyyatına 6,3 milyard dolları, Azərbaycan isə Rusiya iqtisadiyyatına 1,2 milyard ABŞ dolları investisiya qoyub. Rusiyanın ölkəmizə investisiya qoyuluşunun 5 milyard dolları neft, 1,3 milyard dolları isə qeyri-neft sektoruna yönəldilib. Azərbaycanın qonşu ölkəyə investisiya qoyuluşu isə demək olar ki, tamamilə qeyri-neft sektorunun payına düşüb”.
Aydın Hüseynov Avropa İttifaqının Ermənistana xüsusi missiya göndərməsinə də münasibət bildirib, qeyd edib ki, Aİ-nin Cənubi Qafqazda sülh təşəbbüslərinin inkişafında əsas tərəflərdən biridir, bu missiya xoşniyyətlidirsə və Azərbaycan və Ermənistan arasında sülh müqaviləsinin bağlanmasına, ədalətli sülhə xidmət edəcəksə qəbulolunandır. Yox, əgər missiaya ATƏT-in keçmiş Minsk qrupu kimi sülh prosesini və vaxtı daha da uzatmağa şərait yaradan addım atacaqsa, Cənubi Qafqazda Ermənistanın maraqlarından çıxış edəcəksə, sözsüz ki, bu qəbuledilməzdir və Azərbaycan dövləti bu cür davranışı rədd edir. Çünki biz bunu Aİ-də özünü ortaya atmış Fransanın timsalında görə bilərik. Ona görə də Fransa kimi ölkələrin qeyri-konstruktiv addımları Avropanın maraqlarına və Azərbaycanın sülh layihələrinə zidd olan məsələdir. Azərbaycan bölgədə yeni reallıq yaradıb, Aİ və bütün tərəflər də bunua uyğun hərəkət etməlidir”.