Masallı rayonunda böyük mütəfəkkir Teymur Bəy Bayraməlibəyovun 160 illik yubileyi, büstünün açılışı və onun həyatından bəhs edən “Nurlu yol” sənədli filminin təqdimat mərasimi keçirilib.
Arazmedia.az Asiya.az-a istinadən xəbər verir ki, tədbirdə iştirak edən Masallı Rayon İcra Hakimiyyətinin başçısı, millət vəkilləri, ziyalılar öncə Ümummilli Lider Heydər Əliyevin rayonda ucaldılan hekəlini və “Qəhrəmanlar parkı” abidə kompleksini ziyarət edib, qarşısına gül dəstələri düzdülər.
Sonra Masallı rayonu Teymur Bəy Bayraməlibəyov adına 2 saylı Yeddioymaq kənd tam orta məktəbinin həyətində ucaldılan Teymur Bəy Bayraməlibəyovun büstünün açılış mərasimi və yubiley ili ilə əlaqədar bədii-elmi konfrans baş tutdu.
Tədbiri giriş sözü ilə Masallı Xalq Teatrının baş rejissoru Cəmaləddin Əliyev açaraq Teymur bəy Bayraməlibəyovun həyat və yaradıcılığı haqqında məlumat verdi.
Masallı Rayon İcra Hakimiyyətinin başçısı Araz Əhmədov çıxış edərək maarifçi, pedaqoq, folklorşünas, tarixçi-etnoqraf, ictimai-siyasi xadim Teymur bəy Bayraməlibəyovun keşməkeşli, fədakar həyat yoluna nəzər saldı.
İcra başçısı Həsən bəy Zərdabi yolunun etibarlı davamçısı Teymur bəy Bayraməlibəyovun 160 illik yubileyi ilində büstünün açılmasını və haqqında sənədli film çəkilməsini müsbət dəyərləndirdi.
Büstün hazırlanmasının təşəbbüskarı millət vəkili Məşhur Məmmədov çıxış edərək müxtəlif sahələrdə uğura imza atan Teymur bəyin əsas idealarından biri qızların maariflənməsi olduğunu bildirdi. O qeyd etdi ki, bu gün Teymur bəyin maarifçi, xeyriyyəçi ənənələrini “Masallı Təhsil Fondu” layiqincə həyata keçirir.
Millət vəkili gözəl sənət əsərinə görə büstün heykəltaraşı İlqar Balayevə və maraqlı film hazırladıqları üçün “Nurlu yol” filminin yaradıcı heyətinə öz təşəkkürünü bildirdi.
Çıxış edən millət vəkilləri – Anar İsgəndərov, Musa Qasımlı, Fazil Mustafa, Etibar Əliyev, Razi Nurullayev, Filologiya elmləri doktoru Yədulla Ağazadə, “Masallı ziyalıları” cəmiyyətinin sədri Qardaş Fətullayev, “Regional hüquqi və iqtisadi maarifləndirmə” ictimai birliyinin sədri Arzu Bağırova, Bayraməlibəyovun nəticəsi musiqişünas Tamilla Kəngərlinskaya tarixi şəxsiyyətin yubileyinin keçirilməsini, büstünün hazırlanmasını, haqqında sənədli film çəkilməsini müsbət qiymətləndirdilər.
Sonra N.Gəncəvi adına Masallı Mədəniyyət Mərkəzində Teymur Bəy Bayraməlibəyovun həyat və yaradıcılığı haqqında “Masal prodakşn”ın istehsalı olan “Nurlu yol” sənədli filminin nümayişi olub.
Nümayişdən qabaq “Masal prodakşn”ın baş direktoru Cəfər Cəfərov çıxış edərək, sənədli filmin ərsəyə gəlməsində əməyi olanlara öz təşəkkürünü bildirdi.
Qeyd edək ki, “Nurlu yol” sənədli filminin ideya və ssenari müəllifi Cəfər Cəfərov, quruluş və təsvir rejissoru Elsevər Əliyev, montaj rejissoru Faiq Mirzə, operator Nurşad Byramov, Musiqi tərtibatı Ruslan Zahidov, Diktor Gültəkin Cəfərova, Fotoqraflar – Emil Nuriyev, Rəşad Fərəcov, Məsləhətçilər – Məşhur Məmmədov, Teymur Atayev və Fuad Mehdiyevdir.
Sənədli filmdə Teymur bəy Bayraməlibəyov rolunu Masallı Xalq Teatrının aktyoru Cavid Quliyev canlandırıb.
