“Azərbaycan Respublikasının Fransadakı Səfirliyi qarşısında erməni radikal qrupları tərəfindən törədilmiş təxribatçı “aksiya” və səfirliyimizə hücum edərək zərər vurmaq cəhdləri bir daha erməni vandalizminin simasını ortaya çıxarır. Bu, eynilə bir müddət əvvəl Böyük Britaniyadakı Səfirliyimizə hücum edən terrorçuların oxşar vandal hərəkətlərinə bənzəyir. Son günlərdə erməni barbarizminin Livan və digər ölkələrdəki Azərbaycan səfirliklərini hədəfə alması dünya ictimaiyyətində bu millətin hansı əxlaqa və mədəniyyətə malik olması barədə aydın təsəvvür formalaşdırır. Ancaq təəssüf ki, Fransa polisinin bu hadisəyə laqeyd qalması və radikallar barədə sərt tədbirlər görməməsi erməni radikalizminin daha da ayaq açmasına, bu cür təxribatların bir daha təkrarlanmayacağına zəmanət vermir. Ona görə də, Fransa və digər dövlətlər bu xoşagəlməz hadisə barəsində dərhal qanunamüvafiq qaydada ölçü götürməli, təxribatçılar layiqli cəzasını almalı və Azərbaycan Səfirliyinin təhlükəsizliyinin qorunmasını daha etibarlı və fasiləsiz təmin edilməlidir”.
Bu barədə Milli Məclisin İqtisadi siyasət, sənaye və sahibkarlıq komitəsini üzvü Aydın Hüseynov bildirib.
Millət vəkili qeyd edib ki, ümumiyyətlə, Azərbaycanın xarici ölkələrdəki diplomatik nümayəndəliklərinin binalarına qarşı erməni icmaları tərəfindən təşkil edilən hücumlar beynəlxalq təşkilatlar tərəfindən ciddi şəkildə nəzarətə götürülməli, vandalizm və terror şüarları altında dinc insanlara qarşı bu cür zərərli halların qarşısı dərhal alınmalıdır. Ermənilərin bu hərəkətlərinə qarşı sərt addımlar atılmadığından onların cəzasılıq mühitində vəhşiliyi daha da artır və aqressiya üçün yeni zəminlər yaranır. Ona görə də müvafiq dövlətlərin aidiyyatlı qurumları, və beynəlxalq icmalardan erməni təxribatların qarşısının alınması üçün qətiyyətli tədbirlər görəcəyini gözləyirik. Fransa hökumətindən, hüquq-mühafizə orqanlarından isə bu cinayətləri törədənlər barəsində lazimi hüquqi tədbirlər görəcəyinə ümid edirik.