Avqustun 27-də Şuşada Azərbaycan Respublikasının Prezidenti cənab İlham Əliyevin tapşırığına əsasən işğaldan azad edilmiş ərazilərdə bərpa və yenidənqurma sahəsində görülən işlər və planlama, postmünaqişə dövründə minatəmizləmə əməliyyatları və şəhərsalma potensialından istifadə edilməsi, beynəlxalq əməkdaşlıq imkanlarına həsr olunmuş konfrans işə başlayıb. Nümayəndələr arasında Avropa İttifaqının, BMT-nin və bu təşkilatın Qaçqınlar üzrə Ali Komissarlığının, BMT Uşaq Fondunun, İnkişaf Proqramının, Əhali Fondunun, Dünya Bankının, Türk Dövlətləri Təşkilatının, Türk Mədəniyyət və İrsi Fondunun, TÜRKSOY-un, Aviasiya və Hava Məkanından İstifadə üzrə Dövlətlərarası Şuranın, Avropa Yenidənqurma və İnkişaf Bankının, Dialoq və Əməkdaşlıq uğrunda İslam Konfransı Gənclər Forumunun, Beynəlxalq Miqrasiya Təşkilatının, Miqrasiya Siyasətinin İnkişafı üzrə Beynəlxalq Mərkəzin nümayəndəliklərinin rəhbərləri, bütün qitələri əhatə edən, o cümlədən Böyük Britaniya, Niderland, İsveç, Danimarka, Belçika, Almaniya, İtaliya, Müqəddəs Taxt-Tac, Macarıstan, Portuqaliya, Polşa, Çexiya, İran, Səudiyyə Ərəbistanı, Qətər, Bəhreyn, Çin, Filippin, Avstraliya, Yeni Zelandiya, İndoneziya, Kanada, Dominikan, Qvineya, Salvador, Meksika, Panama, Argentina, Braziliya, Qvatemala, Uqanda, Ruanda, Sudan, Çad, Kamerun, Namibiya, Mərakeş, Liviya və digər ölkələrin səfirləri, səfirliklərinin əməkdaşları və hərbi attaşeləri yer alıblar.»
Bu fikirlri «İki sahil»ə açıqlamasında Milli Məclisin deputatı Aydın Hüseynov bildirib.
A.Hüseynov qeyd edib ki, təəssüf ki, Amerika və Fransa səfirlərinin Şuşada keçirilən konfransa qatılmaması bir daha dövlətlərin beynəlxalq hüquqa deyil, öz maraqlarına uyğun hərəkət etdiyi gerçəyini aktuallaşdırır. Tədbirdə iki səfirin iştirak etməməsi təəssüf doğursa da, bütövlükdə işğaldan azad olunan torpaqlarımızın bərpa və quruculuq işlərinə hər hansı təsirləri olmayacaq. Hazırda Şuşa, Hadrut da daxil olmaqla işğaldan azad olunmuş torpaqlarımız yenidən abadlaşdırılır, nəhəng infrastruktur layihələri həyata keçirilir. Azərbaycan bu istiqamətdə fəal işləyir, paralel olaraq strateji müttəfiqi Türkiyə ilə əlaqələrini daha da sıxlaşdıraraq, ordu quruculuğu, müdafiə və təhlükəsizlik sektorunun yenidən qurulması, ərazilərin minadan təmizlənməsi, bərpa olunması istiqamətində müştərək fəaliyyət həyata keçirir .
Deputat əlavə edib ki, Azərbaycanın Ordusunun zəfəri ilə başa çatan 44 günlük müharibənin yaratdığı əsas geosiyasi reallıq odur ki, bütün cəhdlərə rəğmən Qarabağı Azərbaycandan qoparmağın mümkün olmayacağı hər kəsə aydın oldu. Azərbaycan işğalda olan ərazilərinin üçdə ikisindən çoxunu güc yolu ilə azad etdi, düşmənə sarsıdıcı zərbə vurdu. Və bu işi beynəlxalq hüquqdan kənara çıxmadan, müharibə qanunlarına uyğun apararaq, heç bir sanksiyaya, təzyiqə bəhanə vermədi. Doğrudur, Fransanın timsalında belə cəhdlər oldu, amma siyasi ritorikadan o tərəfə keçmədi.
A.Hüseynov sonda yekun olaraq qeyd edib ki, ABŞ və Fransanın bu cür təzyiq cəhdləri, ikitərəfli əlaqələrin xarakterinə zidd olan davranışlar Azərbaycan ictimaiyyətini məyus etsə də xəyal qırıqlığı yaratsa da, bölgədəki siyasi reallıqları dəyişəcək faktor deyil.