Bu gün Cənubi Qafqaza regional səfəri çərçivəsində Avropa Parlamentinin Xarici Əlaqələr Komitəsinin (AFET) sədri, Avropa Parlamentinin deputatı Devid MakAllisterin rəhbərlik etdiyi Avropa Parlamentinin nümayəndə heyəti Bakı Limanına səfər edib.
Tərkibinə Xarici Əlaqələr Komitəsinin sədr müavini Jeljana Zovko, Avropa Parlamentinin deputatı Sven Mikser, Viola Von Kramon, Taubadel, Avropa İttifaqı (Aİ) Parlamentinin və Aİ-nın Azərbaycandakı Nümayəndəliyinin rəsmilərinin də daxil olduğu nümayəndə heyəti ilə görüş zamanı Bakı Limanının Əməliyyatlar departamentinin müdiri cənab Eugene Seah Bakı Limanında icra edilən yaşıl liman əməliyyatları, rəqəmsallaşma, regional əlaqənin yaxşılaşdırılması və davamlı inkişaf sahəsində Avropa İttifaqı ilə birgə icra edilən uzunmüddətli texniki yardım layihələri ilə tanış etdi. Eugene Seah bildirdi ki, Aİ-Bakı Limanı tərəfdaşlığı regionun davamlı və inklüziv iqtisadi artımını dəstəkləyən regional mərkəz kimi Bakı Limanının əməliyyat imkanlarını genişləndirir.
Həmçinin qeyd olunub ki, Aİ Bakı Limanını regionda flaqman layihə kimi qiymətləndirir və bu limanın inkişafı, Şərq-Qərb nəqliyyat dəhlizindəki rolunun gücləndirilməsini, ticarəti asanlaşdıran “Yaşıl Liman”a çevrilməsini, Avropaya və əks istiqamətə tranzit yüklərin daşınmasındakı mühüm rolunun artırılmasını dəstəkəyir. Görüşdə həmçinin Bakı Limanının fəaliyyətinin bərpa olunan enerji mənbələri ilə birbaşa əlaqələndirilməsinə kömək edəcək prespektiv layihələr barədə də fikir mübadiləsi aparılıb.
Görüşdə qərara alınıb ki, Aİ-nin nümayəndə heyəti tərəfindən həyata keçirilən layihələrin nəticələri ilə yaxından tanış olunaraq və Aİ-Bakı Limanı strateji əməkdaşlığının daha da gücləndirilməsi üçün yeni təşəbbüslərin təkmilləşdirilməsi üzrə təkliflər verilsin.
