İyunun 14-də Qaradağ rayonunun tam orta məktəblərində “Son zəng” tədbirləri təntənəli qeyd olunub.

Arazmedia.az xəbər verir ki, Ələt qəsəbəsindəki şəhid Seyfulla Məmmədov adına 110 nömrəli orta məktəbdə keçirilən “Son zəng” tədbirində rayon ictimaiyyətinin nümayəndələri, məktəb kollektivi və valideynlər iştirak ediblər.

Tədbirdə çıxış edən məktəbin direktoru Sərvinaz Hüseynova ulu öndər Heydər Əliyevin Azərbaycan təhsilinin inkişafındakı əvəzsiz xidmətlərindən, bu gün ölkə rəhbərliyi tərəfindən təhsil sahəsində aparılan siyasətdən danışıb.

“Son illər rayonumuzdakı təhsil ocaqlarının yenidən tikilməsi, əsaslı təmir olunaraq müasir avadanlıqlarla təchiz edilməsi təhsildə keyfiyyətin yüksəlməsinə təsir edən amildir. Müstəqil həyatın astanasında dayanan məzunlara ölkəmiz və xalqımız üçün layiqli övlad olmalarını arzu edirəm”, – deyə bildirmişdir məktəb direktoru.