“Bu gün Azərbaycan gəncləri qəhrəman, eyni zamanda istedadlı və gələcəyimiz üçün ümid verən bir nəsil olaraq yetişiblər. Vətən Müharibəsində qəhrəmanlıq dastanı yazan gənclərimiz göstərdi ki, onların formalaşması istiqamətində uğurlu siyasət aparılıb və bu siyasətin banisi Ümummilli lider Heydər Əliyevdir”. Bu fikirləri millət vəkili Aydın Hüseynov Azərbaycan Gəncləri Gününün 25 illiyinə həsr olunmuş Gənclər ForumundaPrezident İlham Əliyevin səsləndirdiyi fikirlərə münasibət bildirərkən deyib. Millət vəkili bildirib ki, Ümummilli liderin sərəncamı ilə 1994-cü il iyulun 26-da Gənclər və İdman Nazirliyi yaradıldı. Bundan sonra isə 1996-ci il yanvarın 26-da verdiyi sərəncamla fevralın 2-si Gənclər Günü kimi qeyd edilməyə başlanıldı: “Bu siyasət Cənab Prezident tərəfindən uğurla davam etdirildi. Azərbaycan gəncliyi ilə bağlı Dövlət proqramları qəbul edildi, 2007-ci il “Gənclər ili” elan olundu, 2011-ci ildə Gənclər Fondu yaradıldı, 2013-cü ildə ölkədə ilk dəfə “Gənclər üçün Prezident Mükafatı” təsis olundu, Azərbaycan gənclərinin İnkişaf Strategiyası təsdiqləndi. Təsadüfi deyil ki, Vətən müharibənin taleyini 2001-ci ildə doğulan gənc nəsil həll etdi. Dövlət başçısı 2003-cü ildə Prezident seçiləndə qəhrəmanlıq tarixi yazan gənclərimiz uşaq idilər. Cənab Prezident “xüsusilə Vətən müharibəsində gənclərin rolu həlledici olmuşdur və biz haqlı olaraq gənclərimizlə fəxr edə bilərik”, – deyə bildirdi. Bu bir reallıqdır, burada düzgün siyasət, cəsarət, qəhrəmanlıq, vətənpərvərlik adına müsbət olan hər şey var”.
Deputat həmçinin əlavə etdi ki, Cənab Prezidentin gənclər günü ilə bağlı təşkil olunan forumda söylədiyi fikirlər gələcəyimiz üçün yol xətitəsidir.
Onun sözlərinə görə, bu gün Dördüncü Sənaye İnqilabı inkişaf etmiş ölkələrin prioritet istiqmətlərindən biridir: “Bu gün bu istiqamətdə fəaliyyət gələcəyə yatırım deməkdir. Həmişə uzaqgörən siyasəti ilə seçilən Azərbaycan liderinin gənclərlə söhbərində bu mövzuya toxunması təsadüfi deyil. Cənab Prezidentin “Dördüncü Sənaye İnqilabı artıq reallıqdır və biz geridə qalmamaq üçün bu istiqamətdə öz addımlarımızı atırıq… Dördüncü Sənaye İnqilabının mərkəzinin Azərbaycanda yaradılması bizə, eyni zamanda, geniş bir informasiya məkanına çıxış əldə etmək üçün köməklik göstərəcək. Ən müasir texnologiyalar buraya gəlməlidir, biz gətirməliyik – həm dövlət, həm özəl sektor və beləliklə, inkişafı təmin etməliyik. Artıq yeni yaradıla biləcək peşələr yaranmaqdadır. Burada mərkəzin olması bizə, yenə də deyirəm, imkan verəcək ki, biz öz iqtisadi siyasətimizi planlaşdıraq, dövlət tərəfindən yeni işlərin yaradılmasına stimul verək, təkan verək, insanların peşə profilini dəyişdirək”, – deyərək yeni dünyanın vacib istiqamətlərindən birinə nə qədər önəm verməsini göstərdi. Bu fikirlər gənclərimizdə yeni dünya ilə bağlı aydın təsəvvür yaradır ki, bu da bizim gələcəyimiz üçün çox önəmlidir”.
Millət vəkili bildirib ki, bu fikirlərin önəmini daha da artıran faktor söylənilən fikirlərin praktiki həyata keçirilməsi üçün zəruri addımların atılmasıdır: “Dövlət başçısı bildirdi ki, gənclər 30-dan çox ölkənin 300-dən çox ali məktəblərinə ezam edilib və bu məqsədlər üçün 200 milyon manat vəsait xərclənib. Cənab Prezident yeni proqramın artıq işlənildiyini və müvafiq sərəncamın keçən il verildiyini dedi və bildirdi ki, ildə təqribən 400-ə qədər gənc dünyanın aparıcı ali məktəblərinə göndəriləcək. Bu ölkəmizin gələcəyi üçün irəli sürülən ideyaların praktiki olaraq həyata keçirilməsi deməkdir. Bu da hər azərbaycanlı üçün mühüm əhəmiyyət kəsb edir”.