“Prezident İlham Əliyevin Brüssel görüşü Azərbaycanın müharibədən sonrakı diplomatik qələbə seriyasının davamıdır. Bunu demək üçün kifayət qədər əsaslar var”. Arazmedia.az xəbər verir ki, bunu millət vəkili Aydın Hüseynov Brüsseldə Azərbaycan Prezidenti İlham Əliyevin Avropa İttifaqı Şurasının Prezidenti Şarl Mişel və Ermənistanın Baş naziri Nikol Paşinyan ilə keçirdiyi birgə görüşün nəticələrini şərh edərkən deyib.
A.Hüseynov əlavə edib ki, Brüssel görüşü ərəfəsində həm Ermənistan həm də erməni diasporu bütün gücü ilə fəaliyyət göstərərək, Azərbaycan hökumətinə təzyiq etməklə istədiyinə nail olmağa çalışsa da dövlət başçısının qətiyyəti və uğurlu strategiyası nəticəsində növbəti dəfə fiaskoya uğradı: “Ermənistanın Minsk qrupunu diriltmə cəhdlərinin burada da üstündən xətt çəkildi. Bununla bağlı məsələ bəyanatda yer almadı”.
Millət vəkili əlavə edib ki, Prezident Avropa İttifaqı Şurası Prezidenti Şarl Mişellə görüşdən öncə NATO Baş katibi Soltenberqlə birgə keçirdiyi mətbuat konfransında da Zəngəzur dəhlizini Laçın dəhlizi ilə müqayisə edərək bu məsələdə nə qədər qərarlı olduğunu bir daha xatırlatdı. Ermənistanın baş naziri Nikol Paşinyanın Zəngəzur dəhlizi ilə bağlı spekulyasiya cəhdinə qarşı isə Cənab Prezident tərəfindən tutarlı Laçın dəhlizi arqumenti irəli sürüldü. Azərbaycan prezidenti “Laçın dəhlizində heç bir post yoxdur. Təbii ki, Zəngəzur dəhlizində də heç bir gömrük postları olmamalıdır. Əgər Ermənistan karqolara, insanlara nəzarət etmək istəsə, biz də Laçın dəhlizində gömrük postu açacağıq. Biz hər iki varianta açığıq. Ya hər iki tərəfdən olmalıdır, ya da olmamalıdır”,- deyə vurğulamaqla Ermənistana bir daha xatırlatdı ki, şərt irəli sürmək durumunda deyilsiniz. Artıq şərtləri qalib Azərbaycan dövləti və onun Müzəffər Ali Baş Komandanı diktə edir”.
A.Hüseynov həmçinin əlavə etdi ki, Avropa İttifaqı Şurasının Prezidentinin üçtərəfli görüşün nəticəsinə dair bəyanatı Azərbaycanın maraqlarına cavab verir: “Bəyanatda münaqişə irsinin aradan qaldırılması, Cənubi Qafqazda sülhün təmin edilməsi üçün Azərbaycanla Ermənistan arasında hərtərəfli sülh müqaviləsinin imzalanması, 2020-ci il 10 noyabr, 2021-ci ilin 11 yanvar və 26 noyabr (Soçi) görüşləri və bəyanatlarından irəli gələn öhdəliklərin yerinə yetirilməsi ilə bağlı yer alan çağırış və dəmir yol xəttinin çəkilişinin vurğulanması Azərbaycanın istəklərinə tam uyğundur.
Şarl Mişelin Brüsselin Ermənistan və Azərbaycana texniki yardım göstərməklə sərhədlərin delimitasiyası və demarkasiyası məsələlərində kömək edəcəyini bildirməsi və eyni zamanda sülhün bərqərar olmasında vacibliyini vurğulaması Azərbaycanın mövqeyi ilə üst üstə düşür…”.