Azərbaycan Prezidenti tərəfindən Milli Məclisə təqdim edilən “Müstəqillik Günü haqqında” qanun layihəsində mayın 28-i Müstəqillik Günü və oktyabrın 18-i isə Müstəqilliyin Bərpası Günü bayram kimi qeyd ediləcəyi nəzərdə tutulur. Hesab edirəm ki, bu, çox düzgün, məntiqli yanaşmadır. İlk növbədə Müzəffər Ali Baş Komandanımızın rəhbərliyi və Ordumuzun rəşadəti sayəsində 44 günlük Vətən müharibəsində torpaqlarımızı işğaldan azad etdik. Artıq Azərbaycanın sözün əsl mənasında ərazi müstəqilliyi tam bərpa olundu. Bir müstəqil dövlət kimi Azərbaycana baxış müsbət mənada dəyişib. Eyni zamanda dövlətimizin qarşıya qoyduğu məqsədlər daha böyükdür və genişmiqyaslıdır. Müstəqillik anlayışı Respublika anlayışından, məfhumundan daha üstündür. Çünki bir xalq, bir dövlət üçün müstəqillik ən böyük nemətdir. Dünya xəritəsində müstəqil dövlət olaraq yer almaq ən yüksək dəyərdir. Respublika isə dövlətin idarə etmə formalarından biridir.
Azərbaycan Konstitusiyasında dövlətimizin unitar Respublika olduğu əksini tapır. Azərbaycan Respublikası 1918-ci il 28 mayda yaradılmış Azərbaycan Xalq Cümhuriyyətinin varisidir. Odur ki, 28 mayın məhz Azərbaycan Respublikasının Müstəqillik Günü olaraq dövlət bayramı kimi qeyd edilməsi vacibdir, məntiqlidir. Bununla dövlətimizin bir sıra hüquqi və mənəvi anlamda hədəflərinə çatması, istəklərinin təmin olunması üçün də əlavə ciddi zəmin yaranır. 28 mayı Müstəqillik Günü olaraq qeyd etməyimiz 114 min kvardrat kilometr ərazisi olmuş Azərbaycan Xalq Cümhuriyyətinin varisi olaraq bizim hüquqi və mənəvi baxımdan hədəflərimizə çatmağa yardımçı olur. Bu gün bizim hüquqi əsaslarımız Azərbaycan Respublikasının sərhədləridir, eyni zamanda mənəvi istiqamətdə hüquqlarımız sırasında 1918-ci ilin 28 mayında qurulmuş Azərbaycan Xalq Cümhuriyyətinin bütün ərazisinə də mənəvi haqqımız var.
O torpaqlara isə həm də Zəngəzur, Göyçə və digər ərazilər aiddir. Bu gün Zəngəzurdan öz tarixi torpaqlarımız kimi istifadə etməyimizə mənəvi hüququmuz çatır. 18 oktyabr 1991-ci ildə o zamankı Ali Sovetdə məhz müstəqilliyimizin bərpası barədə qərar qəbul edilib. O baxımdan da həmin günün Müstəqilliyn Bərpası Günü kimi bayram edilməsi tamamailə düzgündür, məntqilidir.
Aydın Hüseynov millət vəkilli