DÖVLƏTÇİLİYƏ SADİQ OLAQ!

Cəmiyyət

Fövqəladə Hallar Nazirliyinin Tərtərdə “ağ kağız” əməliyyatı-ŞİKAYƏT

2 dəqiqəyə oxunur

Redaksiyamıza Tərtər rayonu Əskipara kənd sakini Kərimli Elmir Namiq oğlu şikayət məktubu ilə müraciət etmişdir.

Məsələ ondan ibarətdir ki, ikinci Qarabağ müharibəsində, mənfur erməni qəsbkarlarının xaincəsinə atdığı iri çarplı silahların mərmiləri bir çox vətəndaş kimi onun da evini dağıdaraq, yararsız hala salıb. Prezident İlham Əliyevin müvafiq sərəncamı ilə, dağıdılmış bütün evlərin, o cümlədən Elmirin evinin düzəldilərək, yenidən istismara yararlı vəziyyətə gətirilməsinə qərar verilib.

Bu işlər Fövqəladə Hallar Nazirliyininə həvalə edilir. Nazirlik isə, yəqin şəxsi münasibətlər zəmnində Tərtərin Əskipara kəndində bu işləri aparmağı İskəndər adlı şəxsin rəhbərlik etdiyi şirkətə tapşırır. İskəndər müəllimin işçi briqadası Elmirin həyətinə gələrək, guya evi yenidən tikməyə başlayır.

Yalandan bəzi işləri görəndən sonra, bir ag kağız gətirirlər ki, bunu imzala ki, “görülən işdən razıyam”. Onu da qeyd edirlər ki, bu sənədləşmə işidir, narahat olma, sənin evini əvvəlkindən də yaxşı düzəldəcəyik.

44 günlük müharibədən çıxmış, qəhrəman Tərtərin ürəkli oğlu Elmir təbii ki, İskəndər müəllimə inanır və o ağ kağızı imzalayır. İnanmır ki, belə müqəddəs vətən müharibəsindən çıxmış bir millətin övladı onu aldadar.

Elmirin qara günləri də elə o vaxtdan başlayır.

Belə ki, vətəndaşın onlara “dil kağızı” verdiyini, daha şikayət edə bilməyəcəyini düşünən “podratçı” şirkət əməkdaşları, “şələ-şülələrini” də yığışdıraraq, təmir-tikinti işlərini yarımçıq qoyaraq, aradan çıxırlar.

Aldadıldığını başa düşən Elmir, Fövqəladə Hallar Nazirliyinə, Tərtər rayon İcra Hakimiyyətinə, İskəndər müəllimin özünə şəxsən dəfələrlə müraciət edib. Lakin heç kim onun səsinə səs vermir ki, vermir…

Əli “yerdən-göydən” üzülən Elmir, çıxış yolunu mətbuata üz tutmaqda görür və Arazmedia.az xəbər portalına müraciət edir ki, problemini işıqlandıraq, ictimailəşdirək ki, ölkə rəhbərliyi bu özbaşınalıqdan xəbər tutsun.

Vətəndaş hesab edir ki, Prezident İlham Əliyevə, onun köməkçilərinə bu məlumat çatsa, dərhal onun evinin düzəldilməsinə göstəriş veriləcək.

Maraqlı suallar meydana çıxır.

Doğrudan da, Fövqəladə Hallar Naziriliyi belə mühüm bir sərəncamın icrasını kimlərə həvalə edib?

Məgər məsuliyyət dərk etmirlər ki, bu sərəncamı “dəmir yumruq” sahibi imzalayıb?

Fikirləşmirlər ki, Prezidentin göstərişi müzakirəsiz, qüsursuz yerinə yetirilməlidir?

Görəsən yerli hökumət-Tərtər rayon İcra Hakimiyyəti hara baxır, ərazidə gedən tikinti-quruculuq işlərinə niyə nəzarət etmir?

Bəlkə elə Fövqəladə Hallar Nazirliyi ilə, Tərtər rayon İcra Hakimiyyəti əlbir olub, dövlət vəsaitini birgə mənimsəyiblər?

Bəlkə Elmir kimi aldadılanlar çoxdur?

Araşdırmamız davam edir.

Şikayətçinin əlaqə nömrəsi: 050-362-34-27

Arazmedia.az