Qaradağ rayonunun Ələt qəsəbəsində yerləşən və yerli əhali arasında “günəş panelləri” kimi tanınan ərazidə baş verən hadisələrlə bağlı ciddi iddialar gündəmə gəlib. Məlumatlara görə, həmin ərazidə bir qrup gəncin, o cümlədən 17–18 yaşlı şəxslərin qeyri-qanuni şəkildə əmək fəaliyyətinə cəlb olunduğu bildirilir.
İddialarda qeyd olunur ki, azyaşlı və yetkinlik yaşına yeni çatmış gənclər əmək müqaviləsi olmadan işlədilir, onların zəhmət haqqı isə ya gecikdirilir, ya da müxtəlif bəhanələrlə ümumiyyətlə ödənilmir. Bu hal təkcə sosial ədalətsizlik deyil, eyni zamanda qüvvədə olan əmək qanunvericiliyinin kobud şəkildə pozulması kimi qiymətləndirilir.
Məsələ ilə bağlı danışan bəzi şəxslər bildirirlər ki, işəgötürən tərəf işçilərlə qeyri-rəsmi münasibətlər qurur, ödənişlə bağlı vədlər versə də, sonradan bu vədlər yerinə yetirilmir. Bundan əlavə, işçilərin əlaqə saxlaması çətinləşdirilir, zənglərə cavab verilmədiyi və müxtəlif bəhanələrlə prosesin uzadıldığı iddia olunur.
Ekspertlər qeyd edirlər ki, 18 yaşına çatmayan şəxslərin əmək fəaliyyətinə cəlb olunması xüsusi qaydalarla tənzimlənir və bu qaydaların pozulması inzibati və hətta cinayət məsuliyyəti yarada bilər. Eyni zamanda, əmək müqaviləsi olmadan işçi çalışdırmaq və əmək haqqını ödəməmək qanunvericiliyə ziddir və ciddi hüquqi nəticələr doğurur.
Yerli sakinlər və zərərçəkənlər aidiyyəti dövlət qurumlarını məsələyə dərhal reaksiya verməyə çağırır. Onlar hesab edirlər ki, baş verənlər obyektiv şəkildə araşdırılmalı, qanun pozuntularına yol verən şəxslər müəyyən edilərək məsuliyyətə cəlb olunmalıdır.
Qeyd olunur ki, məsələ hələlik ictimaiyyətə məhdud şəkildə təqdim edilsə də, problemin həll olunmaması halında daha geniş faktlar, sübutlar və konkret detalların açıqlanacağı istisna edilmir.
Mövzu ilə bağlı rəsmi qurumların mövqeyi olarsa, dərhal dərc etməyə hazırıq.
Arazmedia.az