“Bu gün Azərbaycan iqtisadiyyatı durmadan inkişaf edir, ölkəmizdə davamlı olaraq işlər görülür, konkret addımlar atılır, xüsusilə, Qərbin enerji təhlükəsizliyində çox böyük rol oynayır. Bu da ölkə iqtisadiyyatına öz töhvəsini verir”. Bakı Enerji Həftəsi çərçivəsində 28-ci Beynəlxalq Xəzər Neft-Qaz, 11-ci Xəzər Beynəlxalq Energetika və Yaşıl Enerji sərgilərinin açılışı da görülən işlərin, bu sahədə dövlətimizin yürütdüyü siyasətin məntiqi nəticəsidir. 30 ilə yaxındır ki, ölkəmizdə Xəzər neft-qaz sərgisi keçirilir və bu sərgilər Azərbaycana öz enerji potensialını və bu sahədə əldə etdiyi uğurları xarici investorlara nümayiş etdirmək imkanı yaradır. Azərbaycanın enerji sahəsində əldə etdiyi uğurlar və icra etdiyi beynəlxalq əhəmiyyətli layihələr onun dünya enerji xəritəsində mövqeyini əsaslı şəkildə möhkəmləndirib, əldə edilmiş bu uğurlar ölkənin ümumi inkişafına da böyük dəstək verib, əhalinin rifah halı müsbətə doğru xeyli dəyişib”. Bunu SİA-ya açıqlamasında Milli Məclisin deputatı Aydın Hüseynov deyib.
Deputat qeyd edib ki, bu il keçirilən sərgi əvvəlkilərdən fərqlənir: “Bu il Azərbaycanın Ümummilli Lideri Heydər Əliyevin 100 illik yubileyi keçirilir. Azərbaycanı dünyaya tanıdan, əsas enerji təminatçılarından birinə çevrilməsinə imkan yaradan məhz Ulu Öndər olub. Ulu Öndər iqtisadi inkişafımızın təməl daşı olan enerji strategiyasının banisidir. 1994-cü il sentyabrın 20-də imzalanmış “Əsrin müqaviləsi” Azərbaycan tarixində dönüş nöqtəsi kimi qəbul edilir. İlk Xəzər neft-qaz sərgisi də həmin il keçirilib. Müqavilədə dünyanın yeddi ölkəsindən olan 11 xarici neft şirkətinin imzası var. Azərbaycanda investisiya mühitinin etibarlılığı dünyanın müxtəlif ölkələrindən olan 41 neft şirkətinin ölkəmizlə daha 32 müqavilənin imzalanmasına səbəb oldu. Nəticədə neft sektoruna investisiya qoyuluşları 60 milyard dollara çatdı. Bundan sonrakı dövrdə Ulu Öndər və Prezident İlham Əliyev tərəfindən uğurla həyata keçirilən enerji strategiyası nəticəsində Azərbaycanın dünya dövlətləri ilə əməkdaşlığı genişləndi, iqtisadiyyat hərtərəfli inkişaf etdi, dünya iqtisadiyyatında payı artdı. Enerji siyasəti Prezident İlham Əliyev tərəfindən sonrakı illərdə uğurla davam etdirilib və təkcə neft sahəsində deyil, eyni zamanda, qaz və bərpaolunan enerji sahələrində də nəzərəçarpacaq uğurlar əldə olunub”.