“Bu gün Soçi şəhərində Rusiya Federasiyasının prezidenti Vladimir Putinin vasitəçiliyi ilə Azərbaycan Prezidenti İlham Əliyev və Ermənistanın baş naziri Paşinyan arasında danışıqlar prosesinin növbəti raundu keçirilir. Bundan əvvəllər də münaqişə tərəfləri arasında müxtəliv variantlarda görüşlər keçirilib, amma hələlik ortada konkret bir nəticə yoxdur. Bu da səbəbsiz deyil, çünki Ermənistanın destruktiv əməlləri sülh müqaviləsinin imzalanmasını əngəlləyir. Növbəti görüşdən də gözləntilər yox deyil. Hələlik yekun sənədin imzalanması inandırıcı görünmür. Azərbaycanın şərtləri bəllidir və bu, sülh müqaviləsində də qeyd olunub. Üstəlik də Azərbaycanın Ermənistana təklif etdiyi sülh müqaviləsindəki 5 baza prinsipi bütün beynəlxalq standartlara tam şəkildə uyğundur”. Bunu SİA-ya açıqlamasında Milli Məclisin deputatı Aydın Hüseynov deyib.
Deputat qeyd edib ki, Ermənistan cəmiyyətindəki maksimalist əhval ruhiyyəsi dövlətin gücünə adekvat deyil: “Ermənistan kasıb ölkədir, büdcəsinin bir hissəsi ianələr hesabına formalaşır. Bu qondarma dövlətin yaşamasında diasporun da rolu az deyil. İqtisadiyyatı tənəzzüldədir, 44 günlük müharibədə isə bir daha ağır duruma düşüb. Bu gün Ermənistan Azərbaycanla heç bir sahədə rəqabət apara bilməz, xarici dəstək olmasa uzun illər geriləməni durdura bilməyəcək. Belə olan halda Azərbaycanla zor dilində danışmağa cəhd bu ölkənin sonunu gətirə bilər. Azərbaycan Ermənistana bir daha son şans verib və ermənilər bundan yararlanmasalar, artıq bizim edəcəyimiz heç nə yoxdur. Soçi görüşündən əvvəl Ermənistan cəmiyyətində baş verənlər, dediyimiz kimi, məhz destruktiv əməllərdir. Xankəndində etiraz aksiyası, sülhməramlıların qanunsuzluqlara göz yumması, Qarabağda yaşamayan şəxslərin mitinqlərə planlı şəkildə gətirilməsi, separatçıların aktivləşməsi, Azərbaycan əlehinə şuarların səsləndirilməsi və yenə də bütün bunlara sülhməramlıların seyrçi münasibəti bütövlükdə danışıqların gedişatına təsir məqsədi daşıyır. Amma Azərbaycanın mövqeyi dəyişməzdir, Azərbaycanın ərazi bütovlüyü, suverenliyi bu günə qədər danışıqlar predmeti olmayıb və bundan sonra da olmayacaq”.