İki qardaş ölkə – Azərbaycanla Türkiyə arasındakı münasibətlərinin tarixi qədimdir. Əsrlər boyu birgə yaşamış Azərbaycan və Türkiyəni müxtəlif dönəmlərdə tikanlı məftillər, sərhədlər ayırsa da xalqlarımızın ürəyi daim bir döyünüb. Təsadüfi deyil ki, Türkiyə dövlətinin banisi, qurucusu Mustafa Kamal Atatürk “Azərbaycanın kədəri bizim kədərimiz, sevinci isə bizim sevincimizdir” deyə bildirmişdir. Ulu Öndərimiz Heydər Əliyev də öz müdrik kəlamları ilə hər iki dövlətin gələcək nəsillərinin xatirində əbədi qalacaq bir ifadə işlətmişdir: “Bir millət iki dövlət, Azərbaycan-Türkiyə”.
Türkiyə və Azərbaycan ən çətin dövrlərdə bir-birinə qardaş dəstəyini əsirgəməmişlər. Ötən əsrin əvvəllərində, daha dəqiq desək 1918-ci ildə Nuru Paşanın komandanlığı ilə Türk Qafqaz İslam Ordusunun qanlı döyüşlərdən sonra Bakını daşnak-bolşevik birləşmələrindən xilas etməsi Azərbaycanın dövlətçilik tarixində önəmli dönüş nöqtəsi olmuşdur. Ümummilli lider Heydər Əliyev deyirdi: “Türk ordusunun Azərbaycana, Bakıya gəlməsi, Azərbaycanı daşnakların təcavüzündən xilas etməsi hər bir azərbaycanlının qəlbində yaşayır. Azərbaycan xalqı həmin ağır dövrdə türk xalqının ona göstərdiyi köməyi heç vaxt unutmayacaqdır”.
İki dost və qardaş dövlət arasındakı münasibətlər hazırda Azərbaycan Prezidenti İlham Əliyevin və Türkiyə Respublikasının Prezidenti Rəcəb Tayyib Ərdoğanın rəhbərliyi altında ən yüksək səviyyədə davam etməkdədir. Ölkə rəhbərlərinin qarşılıqlı rəsmi səfərləri hər iki ölkədə böyük təntənə ilə qarşılanır və bu səfərlərinin hər birində iki dost-qardaş ölkə arasında bütün sahələr üzrə sıx əməkdaşlıq daha da möhkəmlənir. Bu gün Türkiyə iqtisadi, siyasi, hərbi və digər sahələr üzrə dünyada lider dövlətlərdən birinə çevrilib, dünya miqyasında güc mərkəzi kimi, bütün bölgələrdə, o cümlədən Cənubi Qafqaz regionunda çox müsbət rol oynayır və bu, bölgənin sabitliyi üçün çox önəmlidir.
Azərbaycan Respublikasının Prezidenti İlham Əliyev çıxışlarının birində qeyd edib ki, Türkiyə dünya miqyasında Azərbaycana ən böyük dəstək verən ölkədir: “Buna görə bir daha təşəkkürümü bildirirəm. Öz növbəmdə bildirməliyəm ki, bütün məsələlərdə, beynəlxalq arenalarda Azərbaycan daim Türkiyənin haqq işini dəstəkləyir. Elə bir məsələ olmayıb və əminəm olmayacaq ki, Azərbaycan öz dəstəyini Türkiyəyə göstərməsin. Hazırda bölgədə gedən bütün proseslərdə birmənalı şəkildə Azərbaycan dövləti və Azərbaycan xalqı Türkiyə dövlətinin və xalqının yanındadır”.
Türkiyə Cümhuriyyətinin Prezidenti Rəcəb Tayyib Ərdoğan isə Azərbaycanın uğurları ilə fəxr etdiyini bildirib: “Bundan sonra bu uğurlara yeni nailiyyətlərin əlavə olunacağına da heç bir şübhəmiz yoxdur. Düşünürəm ki, 20 il əvvəlki Azərbaycan ilə bugünkü Azərbaycanı müqayisə etmək mümkün deyil. Bu gün tamamilə başqa bir Azərbaycan göz önündədir. İnfrastrukturu, quruculuğu ilə daim inkişaf edən, dəyişən bir Azərbaycan var. Təbii ki, burada Azərbaycan iqtisadiyyatının keçən il əldə etdiyi inkişaf islahatlar prosesinin nə qədər doğru olduğunu da ortaya qoymaqdadır”.
Ölkələrimiz arasında müxtəlif istiqamətləri əhatə edən sazişlərin imzalanması böyük bir coğrafi məkanda reallaşdırılan siyasətin əsas konturlarını müəyyən edən mühüm faktorlardandir. Bu günə qədər ölkələrimizin birgə həyata keçirdiyi, o cümlədən Bakı-Tbilisi-Ceyhan, Bakı-Tbilisi-Ərzurum neft-qaz kəmərləri, Bakı-Tbilisi-Qars dəmir yolu xəttinin istifadəyə verilməsi hazırda Azərbaycanın, Türkiyənin və digər ölkələrin enerji təhlükəsizliyinin təmin edilməsində müstəsna rol oynayır.
Ermənistanın 30 illik işğalçılıq siyasətinə son qoymaq məqsədi ilə başlanan 44 günlük Vətən müharibəsində Azərbaycana mənəvi dəstək olan, haqq işimizdə bizimlə birlik nümayiş etdirən Türkiyə müharibədən sonra da bütün dünyaya iki dövlətin sarsılmaz həmrəyliyi və birliyi barədə mesajlar verir. Azərbaycanın mədəniyyət paytaxtı olan Şuşada hər iki ölkə başçısının səsləndirdiyi fikirlər də bu reallığın bariz nümunəsidir. Xüsusilə “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”nin imzalanması ən yüksək zirvədə olan Azərbaycan-Türkiyə münasibətlərinin keyfiyyətcə yeni mərhələyə qədəm qoyduğunu göstərir.
Aydın Hüseynov,
Milli Məclisin deputatı