Bu gün Bakı şəhərinin Qaradağ rayonu Lökbatan qəsəbəsində yerləşən Heydər Əliyev Mərkəzində Qaradağ Rayon İcra Hakimiyyəti və Qərbi Azərbaycan İcmasının birgə təşkilatçılığı ilə “Qərbi Azərbaycan İrsi” kitabının birinci cildinin təqdimatı keçirilib.Bu, təkcə bir kitabın təqdimatı deyil, eyni zamanda tarixi yaddaşımızı, keçmişimizi xatırladan bir tədbir idi.
Arazmedia.az xəbər verir ki, tədbir Ulu Öndər Heydər Əliyevin abidəsi önünə gülqoyma mərasimi ilə başlayıb. İştirakçılar böyük şəxsiyyətin xatirəsinə ehtiramlarını bildirərək, onun milli-mənəvi irsin qorunması istiqamətindəki uzaqgörən siyasətini xatırladıblar.Tədbir iştirakçıları mərkəzin foyesində qeyd olunan kitabın səhifələrini əks etdirən foto şəkillərə və Qərbi Azərbaycana aid kitablara baxış keçiriblər. Tədbir Dövlət Himninin səsləndirilməsi ilə başlayıb. Sonra şəhidlərin əziz xatirəsi bir dəqiqəlik sükutla yad edilib. Daha sonra Qərbi Azərbaycan ərazisində qəbiristanlıqlar və tarixi abidələr üzərində ermənilər tərəfindən vandalizmə yol verilən hadisələri özündə ehtiva edən videoçarx nümayiş olunub. Tədbiri Qaradağ Rayon İcra Hakimiyyətinin başçısı Süleyman Mikayılov açaraq qonaqları salamlayıb və bu layihənin sadəcə elmi bir nəşr deyil, həm də mənəvi borcun təcəssümü olduğunu qeyd edib. Məlumdur ki, illər boyu, zaman-zaman Qərbi Azərbaycanda yaşayan vətəndaşlarımız dədə-baba ocaqlarından, qədim yurd yerlərindən zorla didərgin salınmış, 1905-ci ildən başlayaraq 1988-ci il də daxil olmaqla mərhələ-mərhələ deportasiya olunmuşlar. Ulu Öndər 2 -ci dəfə hakimiyyətə gələn zaman Qərbi Azərbaycandan məcburi köçkün olunmuş vətəndaşlara öz yurdlarına qayıdacağı fikrini dəfələrlə qeyd edirdi. İcra başçısı vurğuladı ki, Qərbi Azərbaycan məsələsi bu gün Azərbaycanın siyasi kursunun prioritet istiqamətlərindən biridir və bu istiqamətdə aparılan işlər Prezident İlham Əliyevin uzaqgörən siyasətinin nəticəsidir.Digər çıxış edənlər Milli Məclisin deputatı Səbinə Xasayeva, Qərbi Azərbaycan İcmasının Amasiya rayonu üzrə koordinatoru Əhməd Rzayev, YAP Qaradağ rayon təşkilatının sədri Qafar Əliyev, şəhid atası Nizami Hüseynov və Qərbi azərbaycanlı ziyalı Kərim Cəfərli kitabın elmi və ictimai əhəmiyyətindən danışaraq qeyd etdilər ki, əsrlər boyunca Qərbi Azərbaycan torpaqlarında formalaşmış zəngin mədəni irs bu gün də xalqımızın mənəvi yaddaşında yaşayır və gələcək nəsillərə ötürülməsi zəruridir. “Qərbi Azərbaycan İrsi” kitabının nəşri bu istiqamətdə atılmış mühüm addımdır.Vurğulanıb ki, Ermənistan ərazisindən zorla çıxarılmış soydaşlarımızın doğma yurdlarına qayıdışı Azərbaycanın milli maraqlarına və beynəlxalq hüququn norma və prinsiplərinə əsaslanır. Bu məsələ bu gün Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən müdrik siyasətin əsas şərtlərindən biridir. Şanlı Zəfərimizdən sonra bu istiqamətdə tarixi prosesin təməli qoyulmuşdur və xalqımız əmindir ki, cənab Prezidentimizin siyasi iradəsi və qətiyyəti sayəsində Qərbi Azərbaycana qayıdışın ədalətli həlli beynəlxalq səviyyədə təmin olunacaqdır.Sonda tədbir iştirakçıları “Qərbi Azərbaycan İrsi” kitabının birinci cildi ilə yaxından tanış olublar və kitabın təqdimatı ilə bağlı fikir mübadiləsi aparılıb.