Yeni Azərbaycan Partiyasının Qaradağ rayon təşkilatı və Qaradağ rayon İcra Hakimiyyətinin birgə təşəbbüsü ilə 20 Yanvar faciəsinin 32-ci ildönümü ilə əlaqədar dəyirmi masa keçirilib.
Arazmedia.az xəbər verir ki, Tədbir 20 Yanvar faciəsində həlak olanların əziz xatirəsinin bir dəqiqəlik sükutla yad edilməsi ilə başlayıb. Sonra çıxış edən Qaradağ rayon İcra Hakimiyyətinin başçısı Süleyman Mikayılov tarix boyu xalqımızın faciələrlə üzləşdiyini və bu faciələrin böyük bir hissəsinin XX əsrdə baş verdiyini, xalqımızın hər zaman özünün azadlığı uğrunda mübarizədə böyük itkilər verdiyini bildirib.20 Yanvar hadisələrinin xalqımızın milli mənliyinə, milli azadlıq ruhuna qarşı təcavüz kimi qiymətləndirən Süleyman Mikayılov Azərbaycan xalqının öz qürurunu itirmədiyini, onun iradəsinin qırılmadığını söyləyib. Onun sözlərinə görə, Azərbaycan xalqı bu faciəni unutmur, hər il xalqımız bu günü anır, şəhidlərin xatirəsini əziz tutur.
Sonra çıxış edən YAP Qaradağ rayon təşkilatının sədri Qafar Əliyev 20 Yanvar faciəsinin baş verməsində M.Qorbaçov başda olmaqla faciənin səbəbkarlarının və günahkarlarının ilk dəfə həmin dövrdə Moskvada yaşayan Umummilli liderimiz Heydər Əliyev tərəfindən bəyan edilməsini xatırladıb. Qafar Əliyev diqqətə çatdırıb ki, 20 yanvar facisənin törədilməsindən bir gün sonra Moskvada Ulu Öndərimiz Heydər Əliyev bəyanat verərək bu qətliamı kəskin şəkildə pisləyib, keçmiş SSRİ hakimiyyətini ittiham edib. Ulu Öndərimizin bu bəyanatı nəticəsində dünya ölkələri Azərbaycan xalqının başına gətirilən bu faciədən xəbərdar oldular. Daha sonra Ulu Öndər Heydər Əliyev Azərbaycanda hakimiyyətə qayıtdıqdan sonra 20 Yanvar faciəsinə siyasi qiymət verilib.
Q.Əliyev, həmçinin qeyd edib ki, Azərbaycan dövləti tərəfindən 20 Yanvar şəhidlərinin adının əbədiləşdirilməsi, onların ailələrinə qayğı göstərilməsi istiqamətində lazımi işlər görülüb və Prezident İlham Əliyev tərəfindən daim bu siyasət davam etdirilir.
20 Yanvar hadisələri zamanı əlil olmuş Bafadar İbrahimli çıxış edərək o müdhiş gecənin canlı şahidi kimi xalqımıza qarşı törədilən qırğınları xatırladıb.
Tədbirdə rayon rəhbərliyi dəyirmi masada iştirak edən 20 Yanvar faciəsi əlillərinin və şəhid ailəsinin problemləri ilə maraqlanıb. Görüşün sonunda 20 Yanvar faciəsi əlillərinə və şəhid ailəsinə maddi yardımı göstərilib.